Bələdiyyə seçkiləri sakit atmosferdə keçirilib, amma...
Avropa Şurası Yerli və Regional Hakimiyyətlər Konqresinin Azərbaycandakı bələdiyyə seçkilərinə dair hesabatı martın 18-də dinləniləcək
09.03.2010
«Azərbaycanda bələdiyyə seçkiləri texniki cəhətdən yaxşı hazırlanıb və sakit atmosferdə keçirilib. Amma...»
Bu, Avropa Şurasının saytında Azərbaycandakı bələdiyyə seçkilərinə dair hesabatın ilkin versiyasında deyilir.
«Amma...Namizədlərin qeydiyyata alınması və səssayma prosesində rast gəlinən pozuntular seçkinin nəticələrinin dürüstlüyünü şübhə altına alır».
Hesabatın ilkin versiyasında real müxalifətin seçkidə iştirakının azlığı, seçki təbliğatının televiziyalarda və küçələrdə aparılma imkanının məhdudluğu qeyd olunur.
Konqres hesabatda çatışmazlıqları sadaladıqdan sonra Azərbaycan iqtidarına öz tövsiyələrini çatdırır. Bunlar arasında media plüralizmini inkişaf etdirmək, xarici radiostansiyaların FM tezliyini qaytarmaq, həbsdə olan jurnalistləri azad etmək məsələləri də var.
Avropa Şurası Yerli və Regional Hakimiyyətlər Konqresinin Azərbaycandakı bələdiyyə seçkilərinə dair hesabatı martın 18-də dinləniləcək.
Hesabatı fransalı Fransis Lek təqdim edəcək. Lek 2009-cu il dekabrın 23-də Azərbaycanda keçirilmiş bələdiyyə seçkilərində müşahidəçi olub.