Dövlət Neft Akademiyasındakı qətliamda təqsirləndirilənlərin vəkilləri hesab edir ki, müdafiə etdikləri şəxslərin bu cinayətdə təqsirləri yoxdur.
İyulun 30-da Ağır Cinayətlərə Dair İşlər üzrə Məhkəmədə keçirilən məhkəmə iclasında vəkillər müdafiə çıxışı etdilər. Hakim məhkəmə iclasında jurnalistlərə video və foto çəkilişlər aparmağa, həmçinin audioyazı cihazlarından istifadə etməyə icazə vermədi. Nadir Əliyevin vəkili istisna olmaqla, digər vəkillər təqsirləndirilənlərə bəraət istədilər.
ETİRAFEDİCİ İFADƏLƏRİN ALINMASINDA İTİN KÖMƏYİ Prosesdə əvvəlcə Cavidan Əmirovun vəkili Hüseynxan Mustafayev çıxış etdi. Vəkil diqqəti əsasən ona yönəltdi ki, Cavidan Əmirov digər təqsirləndirilən şəxs Nadir Əliyevin ifadəsi əsasında həbs olunub. Lakin Nadir Əliyev məhkəmədə etiraf edib ki, ondan ifadələr işgəncə altında alınıb. Nadir Əliyev məhkəmədə ibtidai istintaqa verdiyi ifadələrindən imtina edib. Hazırda onunla eyni müttəhimlər kürsüsündə əyləşən Cavidan Əmirovun və digərlərinin adlarını da işgəncə altında çəkdiyini deyib.
Vəkil bildirib ki, məhkəmədə istintaq dindirmələri ilə bağlı videolentə baxış keçirilərkən də kadrlardan görünüb ki, Nadir Əliyevlə dindirmə aparılan otaqda it var. Müstəntiqlər həmin iti Nadir Əliyevin üstünə qısqırdırlar, it dayanmadan hürür, bu da istintaq olunan şəxsə psixoloji təsir göstərmək məqsədi daşıyıb. Bu barədə vəkil AzadlıqRadiosuna da danışıb:
«Neçə aydır məhkəmə araşdırması gedir, bir sübut yoxdur ki, bu dörd nəfərin o cinayətdə əli var. Bircə Əliyev Nadir istintaq zamanı ifadəsində göstərib ki, guya belə bir söz eşidibmiş ki, bunlar belə bir cinayətə hazırlaşırlar. Məhkəmə iclasında da hamısını dandı ki, mənə işgəncə altında yazdırıblar. Dedi ki, itlə qorxudublar, mənə psixoloji təsir göstəriblər, ona görə mən belə yazmışam, belə bir iş olmayıb, yazdıqlarımı da danıram».
«HÜQUQ-MÜHAFİZƏ ORQANLARIMIZ QUMAŞYANI HİMAYƏ EDİR»Hüseynxan Mustafayev həmçinin məhkəmənin nəzərinə çatdırıb ki, iş materiallarında adı terroru maliyyələşdirməkdə və təşkil etməkdə hallanan Gürcüstan vətəndaşı erməni Mardun Qumaşyanın hələ də cinayət məsuliyyətindən kənarda qalması Azərbaycanın hüquq-mühafizə orqanının həmin erməninin həbsində maraqlı olmamasıdır:
«Mardun Qumaşyan iş materiallarında milli ədavətçi, düşmən sözləri ilə qeyd olunur. Bir tərəfdən də onun cəzalandırılmasına maraq göstərilmir. Burdan da belə nəticə çıxır ki, Azərbaycanın hüquq-mühafizə orqanları düşməni, milli ədavətçini himayə edir».
«İNTERPOL HEÇ KƏSİ AXTARMIR»Məhkəmədə ittihamı müdafiə edən prokurorlarsa replika hüquqlarından istifadə edərkən dedilər ki, Mardun Qumaşyan barədə cinayət işi ayrılıb və o,
Vəkillər hesab edir ki, müdafiə etdikləri şəxslərin cinayətdə təqsirləri yoxdur axtarışdadır.
Lakin Hüseynxan Mustafayev deyir Qumaşyanı heç kəs axtarmır:
«İbtidai araşdırma orqanı iki versiya üzərində işləyib. Bunlardan biri odur ki, bu terroru Gürcüstan vətəndaşı Mardun Qumaşyan maliyyələşdirib və təşkil edib. Onun barəsində cinayət işi ayrılmalıdır və göndərilməlidir Gürcüstan Respublikasına. Çünki oranın vətəndaşı olduğuna görə Gürcüstan onu bizə verməz. Burdan cinayət işini göndərməlidirlər ki, onu Gürcüstan məhkəməsi mühakimə etsin. İttiham aktında göstərilib ki, onun barəsində axtarış elan olunub, ancaq mən «İnterpol»un Azərbaycan bürosundan rəsmi məktub almışam ki, belə bir adam axtarışda deyil».
Hüseynxan Mustafayev məhkəmədən Cavidan Əmirov barəsində bəraət hökmü çıxarılmasını xahiş edib. Həmçinin xahiş edib ki, Cavidan Əmirovun işgəncə altında boynuna saxta ittihamlar qoymuş istintaqçılar özləri cinayət məsuliyyətinə cəlb olunsunlar.
Vəkil hesab edir ki, hakimlər məhkəmədə araşdırılan sübutlara qiymət verməlidilər, onlar ibtidai istintaq orqanının gəldiyi nəticə ilə kifayətlənməməlidirlər.
«VİDEOGÖRÜNTÜDƏ FƏRDA ONLARIN ADNI ÇƏKMİR» Sonra Nadir Əliyevin vəkili Elman Ağayev çıxış etdi. Vəkil Nadir Əliyevə istintaq vaxtı verilən işgəncələrdən danışdı. Dedi ki, ittihama inanmalı olsaq, Fərda Qədirovla bağlı MTN-nin yaydığı videogörüntülərdə Fərda Qədirov tərəfindən təqsirləndirilən şəxslərdən heç birinin adı çəkilməyib. Çəkilən ad yalnız Sergey adlı birisinin adıdır:
«Bu şəxslərin cinayətdə əli olmayıb. Ona görə də, bu cinayətdə mütəşəkkil dəstədən söhbət gedə bilməz».
Elman Ağayev ittiham tərəfinin Fərda Qədirovun milliyyəti, dini, irqi və hansı etnosa bağlı olması haqqında məlumat vermədiyini də söylədi. O, bildirdi ki, ittiham tərəfi Fərda Qədirovun hansı millətə və etnosa məxsus olması mütləq göstərilməlidir.
Elman Ağayev dedi ki, müdafiə etdiyi şəxsin təqsiri yalnız ondan ibarət olub ki, cinayət barədə əvvəlcədən xəbəri olsa da bu barədə hüquq-mühafizə orqanlarına məlumat verməyib. Məhkəmədən xahiş etdi ki, Nadir Əliyev barəsində olan ittihamlar Cinayət Məcəlləsindəki xüsusilə ağır cinayətin hazırlanmasını və ya törədilməsini bilərək həmin cinayət barəsində xəbər verməmə maddəsinə tövsif edilsin və ona bu maddənin ən yuxarı sanksiya həddində cəza verilsin.
«BİR ŞİLLƏYƏ ÜÇ NƏFƏRİ TUTDURANDAN TERRORÇU OLMAZ»Neft Akademiyasında qətliam, 30 aprel 2009 Məhkəmədən müvəkkilinə bəraət istəyən vəkillərdən biri də Nəcəf Süleymanovun vəkili Səyyarə Əliyeva oldu. O, dedi ki, müttəhimlər kürsüsündə oturanların araşdırılan ağır cinayətdə əli olmasına inanmır:
«Siz bu Nadir Əliyevə yaxşı-yaxşı baxın. Görün bu adamdan terrorçu çıxar, ya yox? Bir şilləyə günahsız üç nəfərin burda oturmasına baiskar olub. Terrorçu dəqiq, bilikli, punktual olmalıdır. Bu adamlar adlarını belə yaza bilmirlər, iki kəlmə sözü bir-birinin ardınca düzə bilmirlər».
Ariz Qabulovun vəkili Səyyad Mirzəyev də müdafiə etdiyi şəxs barəsində olan ittihamın məhkəmə istintaqı dövründə sübuta yetirilmədiyini əsas gətirərək, məhkəmədən bəraət hökmü çıxarılmasını xahiş etdi.
SON SÖZ AVQUSTUN 4-DƏ OLACAQ Vəkillərin çıxışı başa çatandan sonra hakim növbəti məhkəmə iclasını avqustun 4-ə təyin etdi. Həmin gün təqsirləndirilən şəxslər son sözlə çıxış edəcəklər.
Prokurorlar Nadir Əliyevə, Cavidan Amirova və Nəcəf Süleymanova ömürlük, Ariz Qabulova isə 11 il müddətinə cəza istəyiblər. Bu şəxslər 2009-cu ilin aprel ayının 30-da Neft Akademiyasında Fərda Qədirov tərəfindən törədilən qətliamda Fərda Qədirovla əlbir olmaqda təqsirli bilinirlər. Həmin qətliamda 12 nəfər odlu silahla qətlə yetirilib, 20-dən artıq insan yaralanıb. Fərda Qədirov qətliamı törədəndən sonra hadisə yerində özünü də öldürüb. Lakin təqsirləndirilən şəxslər məhkəmə ifadələrində cinayətin işgəncə altında boyunlarına götürdüklərini söyləyiblər. Məhkəmə iki dəfə ekspertiza təyin edib və hər iki ekspertizanın rəyində onların üzərində işgəncə izi aşkar olunmadığı qeyd edilib.