Şəkidəki «Marxal» istirahət mərkəzini hansısa oliqarx özününküləşdirmək istəyir. Bunu AzadlıqRadiosuna mərkəzin sahibi, 2000-ci il Şəki hadisələrinə görə həbsdə yatmış Tehran Lətifovun qardaşı Rahim Lətifov deyir.
(Tehran Lətifov
özü müsahibə vermək istəmədiyinə görə məlumatları qardaşından almalı olduq. Yada salaq ki, Tehran Lətifov 2000-ci ilin noyabrında - parlament seçkilərindən sonra Şəkidə baş vermiş iğtişaşların təşkilində günahlandırılıb, bir neçə ildən sonra əfvə düşüb. Seçki saxtakarlıqlarına etiraz olaraq keçirilən həmin aksiyalarda bir qrup gənc icra hakimiyyəti və polisin binasını daşa tutmuşdu. Müxalifət isə həmin qrupun təxribatçı olduğunu deyirdi).
1998-ci ildə Tehran Lətifov hazırda «Marxal» istirahət mərkəzinin yerləşdiyi, vaxtilə Şəki İpək Açıq Səhmdar Cəmiyyətinin (ASC) balansında olan binanı özəlləşdirib. Üstündən altı il keçəndən sonra, 2006-cı ildə Şəki İpək ASC məhkəmə iddiası qaldırıb ki, mərkəz düzgün özəlləşdirilməyib, geri qaytarılmalıdır. Bundan əvvəlki məhkəmə qətnamələri ASC-nin xeyrinə çıxarılıb. Hazırda iş Ali Məhkəmənin Plenumundadır.
İCRA HAKİMİYYƏTİNDƏN GİZLİ GÖSTƏRİŞ?- Bir yerə ki, icra hakiminin mənfi fikri oldu, idarə müdirləri ora getməyə qorxurlar ki, onları işdən çıxararlar. Tapşırıq verirlər ki, ora getməyin. Şəkidə bir 50-100 idarə varsa, əgər icra başçısının göstərişi varsa ki, ora getməyin, onlar da qorxurlar getməyə. Bu da alverə təsir göstərməlidir.
Rahim Lətifov deyir ki, nə vaxtsa Şəkidə «Marxal» istirahət mərkəzinin bağlı olması barədə elanlar da vurulubmuş. Elə onun özünün işlədiyi yeməkxananın qabağını da hasarlayıblar. Yəni, dediyinə görə, ailəyə hərtərəfli təzyiqlər eləyirlər.
Yuxarıların göstərişi «Marxal»ın işinə əməlli-başlı təsir göstərib R.Lətifov deyir ki, bir tərəfdən qlobal böhran, digər tərəfdən yuxarıların göstərişi «Marxal»ın işinə əməlli-başlı təsir göstərib. Ancaq məsələ heç də gəlirlərin azalmasında deyil:
- Məsələ heç gəlirdə də deyil, söhbət prinsipdən gedir.
ŞƏKİ İPƏK ASC VƏ İCRA HAKİMİYYƏTİNDƏN DEYİLƏNLƏRŞəki İpək ASC-nin İdarə Heyətindən bütün sualları müəssisənin hüquqşünasına verməyi məsləhət gördülər. Hüquqşünas Ruhəngiz Nedeva isə bildirdi ki, məhkəmə işinin nə yerdə olması barədə qarşı tərəfin – «Marxal» istirahət mərkəzinin rəhbəri Tehran Lətifovdan məlumat ala bilərik. Çünki onun əlində nə məhkəmə qətnamələri var, nə də iş barədə ümumi məlumat verə bilər.
Şəki rayon İcra Hakimiyyətinin şöbə müdiri Rafael Manafovsa deyir ki, icra hakimiyyəti özəl sektora maneələr yox, şərait yaradır. O, «Marxal»a getməməyə dair gizli göstəriş barədə deyilənləri isə «şayiə» adlandırdı:
- Mən özüm təxminən bir ay bundan qabaq Avropa Birliyindən gəlmiş bir xanımı tərcüməçisi ilə birlikdə həmin istirahət mərkəzində çay süfrəsinə dəvət etmişəm. Mərkəz işləyirdi, mən orda qeyri-adi bir şey görmədim.
CAHANGİR HACIYEVİN «MARXAL»LA NƏ ƏLAQƏSİ?«Şəki İpək ASC onu özəlləşdirmək istəyirsə, bunun Beynəlxalq Banka heç bir aidiyyatı yoxdur» «Marxal»dan Rahim Lətifovun dediyinə görə, istirahət mərkəzini Rusiyada yaşayan azərbaycanlı milyarder, prezident İlham Əliyevin qudası Araz Ağalarovun almaq istəməsi barədə söz-söhbət gəzsə də, məqsəd camaat arasında xof yaratmaq, əsl himayədarı ört-basdır etməkdir. R.Lətifov deyir ki, əslində «Marxal»ı Beynəlxalq Bankın İdarə Heyətinin sədri Cahangir Hacıyev
ələ keçirmək istəyir.
Beynəlxalq Bankın mətbuat xidmətinin rəhbəri Rauf Ağayev
isə AzadlıqRadiosuna bildirdi ki, bank Şəki İpək ASC-nin səhmdarı deyil, sadəcə, ipək, pambıq, tütün kimi strateji sahələrin inkişafında maraqlıdır və onlara kredit ayırır. Rauf Ağayev «Marxal» məsələsində Cahangir Hacıyevin adının hallanmasını belə şərh etdi:
- Vallah, soruşsaq, mənim haqqımda da deyə bilərlər ki, Los-Ancelesdə nəsə bir imarət götürmək istəyir. Amma rəsmi elə bir söhbət yoxdur axı. Şəki İpək ASC onu özəlləşdirmək istəyirsə, bunun Beynəlxalq Banka, yaxud Cahangir Hacıyevə heç bir aidiyyatı yoxdur. Biz bir-birimizlə borcverən-borcalan qismində partnyoruq.
VƏKİL: «BU, QULDURLUQDUR»İllər sonra özəlləşmənin ləğv olunması barədə qərar çıxarmaq qanunsuzluq yox, quldurluqdur, çünki iş üzrə iddia müddəti bitib. Bunu isə «Marxal» istirahət mərkəzinin vəkili Aslan İsmayılov deyir:
- 1998-ci ildə həmin yer özəlləşdirilib, heç bir qanunsuzluq olmayıb. 12 il sonra adamın mülkünü əlindən almaq istəyirlər. Görünür, çox güclü adam meydana çıxıb əlindən almaq istəyir. Adam (Tehran Lətifov - red) bütün varlığını tamam xarabaxana olan bir yerə həsr edib oranı cənnətməkana döndərib.
Qüvvədə olan Mülki Məcəllənin 373-cü bəndində ümumi iddia müddəti 10 il, xüsusi hallar üzrə altı il göstərilir. Aslan İsmayılov deyir ki, 2000-ci iləcən qüvvədə olan Mülki Məcəlləyə görə isə iddia müddəti bir il olub.
Aslan İsmayılov deyir ki, sadəcə əmlakın yenidən bölüşdürülməsi davası gedir, hansısa oliqarx məhkəmələrə təsir etməklə, mülkiyyət ələ keçirmək istəyir:
- Cürbəcür yüksək vəzifəli oliqarxların adı hallanır. Kimliyindən asılı olmayaraq bu, quldurluqdur. Günün günorta çağı məhkəmə vasitəsilə şəxsin əmlakını əlindən alırlar. Bu üç illik məhkəmə süründürməçiliyi olmasaydı, «Marxal» dövlətə milyonlarla manat vergi ödəmişdi.
Vəkil Aslan İsmayılovun dediyinə görə, Plenum da Şəki İpək ASC-nin xeyrinə qərar çıxarsa, onda işi Avropa Məhkəməsinə göndərəcəklər.
«Marxal» istirahət mərkəzi Şəkidən 4 km-lik məsafədə, dağın ətəyində yerləşir.